5 ديال الأخطاء خاصك تجنبها إلا كنتي كاتفكر تفتح متجر فشوبيفاي

نونبر 8, 2019 0 Comments

شوبيفاي كاتقدم ليك مساعدة ودعم كبير باش تبني متجر إلكتروني زوين وتبدا النشاط التجاري ديالك في أقل وقت وبأقل جهد، ولكن كاين بعض الأخطاء ليضروري خاصك تعرفها وتجنبها باش مايفشلش المتجر الإلكتروني ديالك وتبقى غادي مزيان وتزيد لقدام بلبيزنيس ديالك.
فهاد المقال غانتعرفوا على 5 ديال الأخطاء ليممكن تخليك تفكر دير للمتجر ديالك Pause أو تسدو وتخلا عليه وكيفاش ممكن تجنبها.

يمكنك تجربة شوبيفاي مجانا لمدة 14 يوم| Shopify 14 days trial

أول خطأ: بزاف ديال المسوقين المبتدئين كايتسناو يربحوا من المتاجر ديالهوم من أول أسبوع

المسوقين ليعندهوم تجربة متواضعة فالمجال كايظنوا بلي منين يفتحوا متجر شوپيفاي ويعمروه بالمنتجات غاتجيهوم المبيعات من أول أسبوع وغايبداو فالربح بأقل مجهود، هادي فكرة مغلوطة وماعندها حتا أساس من الصحة حيت أول حاجة محتاجليها هي تعرف كيفاش تجيب ناس ليغايكونوا زبناء ديالك وكيفاش تحافظ عليهوم.
ثاني حاجة خاصك تكون متميز بالمقارنة مع المنافسين ديالك وتخلي المتجر ديالك يكون à jour وديما تبين للزبون ديالك بلي كاين الجديد باش مايحسش بالملل، ومنها كاتبين للزبون بلي المتجر ديالك كاتسيرو ناس محترفة
ثالث حاجة هي خاصك تركز على خدمة الزبناء أثناء القيام بعملية الشراء وحتا من بعد مايشري، خاص الزبون يحس براسو ملك وهو كايتعامل معاك حيت هادشي كايساعد بزاف باش تكون عندك Social Proof زوينة

الخطأ الثاني: عدم وضع خطة عمل قبل البدأ

ماشي منطقي تبدا فمشروع تجاري ونتا ماعندكش رؤيا أو فكرة على الهدف ليباغي توصليه وماحاطش ليه خطة عمل، خاصك تعرف بلي من بين لحوايج لييقدروا يخليو المشروع ديالك يفشل هي أنك تبدا ونتا ماموجدش خطة ومنهجية ليغاتخدم بيها، وهنا بغيت نوضح واحد النقطة بلي الخطة ليغاتوجد خاصها تشمل الجانب العملي وحتا الجانب المادي، يعني خاصك تكون حاط وموجد الميزانية ليغاتصرف على لبيزنيس أو المتجر ديالك وليكاتشمل ( الإشتراك الشهري ديال شوپيفاي، التطبيقات، تيم، مصاريف الإشهارات …. إلخ ) باش ماطيحش فالخسارة وتكون الأمور ديالك مضبوطة ومحسوبة مزيان.

الخطأ الثالث: ماكاتحطش راسك بلاصت لكليان

من بين الأخطاء ليكايطيح فيها بزاف ديال الناس هو الأنانية، المقصود بالأنانية هنا هي عدم التفكير فتوفير ظروف مريحة ومناسبة للزبون باش يمر من تجربة شراء زوينة بزاف وهو كايتعالمل معانا، فكر فوجهة النظر ديال لكليان ديالك وحط راسك بلاصتو وتسائل معا راسك شنو لحوايج ليغايخليوه يشري من عندنا ويتعامل معانا بشكل مستمر وديرهوم وشنو لحوايج ليغايخليوه يمشي ومايرجعش وتجنبهوم، هاككا غانعرفوا كيفاش نرضيو الزبون ونحافظوا عليه ونستافدوا من السمعة والصورة الزوينة ليغايعطي للناس علينا، الأمر بسيط بزاف ومافيهش تعقيدات

الخطأ الرابع: عدم تحليل النتائج وعدم مراقبة المنافسين

النتائج ديال الخطط ليحطيتي أو النتائج ديال الحملات الإعلانية ليدرتي مهم بزاف أنك تحللها باش تعرف فين عندك النقص وتصلحوا، النتائج ديالك هما المفتاح ديال النجاح ديال الخطوة الجاية ليغاديرها، هادي من جهة،
من جهة أخرى ماتنساش تراقب المنافسين ديالك حيت ماغاتعرفش كيفاش تفوق عليهوم إلا معرفتيش طريقة العمل ديالهوم أو الإستراتيجيات ليكايعتامدوا عليها فالتسويق للمنتجات ديالهوم، ومن بين الأساليب ليتقدر تستعمل باش تعرف الإستراتيجيات ديالهوم مثلا تشتارك فالقائمة البريدية ديالهوم باش يوصلك الجديد، وتعرف فين عندك النقص وتصلحو.

الخطأ الخامس: المنتوج تسالا من المخزون ديالك ولكليان مافخباروش

باش يكون عندك متجر ناجح خاصك دائما دير تحديث للمنتوجات ليكاينة فسطور ديالك، حيت ماشي فصالحك لكليان يدخل يشري من عندك شي منتوج وفلخر تعيط ليه وتعتاذرليه باش تقوليه بلي المنتوج تسالا من المخزون ديالك، لكليان فهاد لحالة غايحس براسو ضيع وقتو معاك وماستافد والو، وهاذا خطأ فادح حيت هاد الزبون ماغايفكرش يعاود يتعامل معاك وغاياخذ فكرة خايبة على المتجر أو لبراند ديالك وهادشي غايتسبب فعدم إرضاء الزبناء وفقدان الثقة والمصداقية ديالك قدامهوم وبالتالي نقص فالمبيعات