كيفاش نكتب مقالة صديقة لمحركات البحث ديال Google؟ (الجزء الثاني)

تأكد من الروابط ليكاتدرج داخل المقالات ديالك

إلا كنتي كاتهضر فالمقالة ديالك على دراسة حالة أو شي موضوع كايحتاج دعمو بروابط خارجية باش تزكي المعلومات ليعطيتي للقارئ وتأكدليه المصداقية ديالها خاصك ترد لبال للمراجع ليكاتلتاجأ ليها وتراجع المصدر ديالها وتأكد بلي هو مصدر موثوق ومعروف و RANK ديالو طالع حيت غايساهم فرفع RANK ديال الموقع ديالك كذلك.
وبهاد الطريقة غاتعطي للزبون ثقة أكثر فالمعلومات ليكاتعطيه.
أحسن طريقة باش تدرج الروابط هي أنك درجها من خلال الكتابة ديالك ( تربطها بكلمات من المقالة ديالك) أو تخصص ليها جزء فآخر المقال

ربط المقالات ديالك ببعضها

أنك تربط المقالات ديالك ببعضها كاتعتابر حركة ذكية منك حيت بهاد الطريقة كاتساعد القارئ باش يقرا المزيد من المقالات ديالك ويتعرف كثر على المحتوى ليكاتسوقليه.
كذلك كاتسهل عليه التنقل من مقالة لمقالة وهادشي كايقربك أكثر للهدف الرئيسي من كتابة المقالات ولي هو توصليه المنتوج أو العرض ديالك بطريقة غير مباشرة وبلا مايحس وتخليه يدوز وقت أطول فالقراءة حيت محركات البحث كاتاخذ بعين الإعتبار المدة ليكايدوزها كل زائر فالموقع ديالك وكاتعتابرو مرتاح وهو كايتصفح الموقع ديالك وبالتالي كاتزيد طلع التصنيف ديالك أكثر وأكثر.

تجنب كلمة “Click Here ” فالمقالات ديالك

إذا قررتي أنك ضيف روابط فالمقالات ديالك سواء كان هاد الرابط كايعود على مقال داخل أو خارج الموقع ديالك خاصك تعرف بلي مهم بزاف تجنب كلمة “إضغط هنا”
من الأحسن تكتب كلمة دلالية كاتبين فيها الوجهة ديال الرابط وهاكدا كاضرب عصفورين بحجر واحد ولي هما الحفاظ على الجمالية ديال المقال ديالك ومساعدة محركات البحث يتعرفوا عليك .

ماتبالغش فعملية التسويق

إلا كان الهدف ديالك من المقالات ليكاتكتب هو أنك تبيع شي منتوج أو تسوق لشي عرض أو تخفيض كانصحك ماتبالغش فالعملية ديال التسويق وخلي الفائدة من المقال ديالك تغلب الرغبة ديالك فبيع المنتوج باش ماتنفرش القارئ، حيت أي واحد منا كايضايقو التسويق المبالغ فيه.
خليك ديما مفكر بلي المقالات كاتكون نسبة الفائدة منها طالعة وغالبة بزاف على نسبة التسويق حيت كيفما قلنا الهدف لكبير من كتابة المقالات هو رفع وارتقاء التصنيف ديالك فمحركات البحث ولي بالدور ديالو غايساعدك باش تزيد المبيعات بشكل مستمر.
فكر على المدى البعيد باش تقدر تبني لبيزنيس ديالك على أسس قوية وثابتة

تجنب الأخطاء الإملائية

تجنب الأخطاء الإملائية وراجع المقال ديالك فقرة بفقرة أو ستاعن بشي واحد يراجع موراك قبل ماتنشروا ويشوفوه الناس، وماتخليش أخطاء إملائية تنقص من القيمة ديال الإسم التجاري ديالك،
منين كاتراجع المقال ديالك ماكاتكونش تجنبتي فقط الأخطاء الإملائية ولكن كاتخلي القارئ يحتارم المحتوى ديالك ويعطيه قيمة ويشاركوا مع الآخرين وبالتالي ل Feedback ديال الناس عليك غايكون إجابي وزوين والنسبة ديال Recommandation على المقالات ديالك غاتكون طالعة بزاف

الجزء الثالث