كيفاش تكتب مقالة صديقة لمحركات البحث ديال Google(الجزء الثالث والأخير)
نكملوا فالنصائح ليكاتجعلك تكتب مقالة فسطور ديالك لي كاتساهم فزيادة التصنيف ديالك فمحركات البحث وبالتالي كايتزاد ترافيك ديالك ومن طبيعة لحال المبيعات والعائدات حتا هما كايتزادوا
استعمل صور عالية الجودة فالمقالات ديالك
كون دائما حريص على الإستعمال ديال صور عالية الجودة وخصوصا الصورة الإفتتاحية ديال المقالة ديالك حيت هاد الأخيرة كاتخطف البصر ديال القارئ قبل حتا مايقرا العنوان ديال المقالة ديالك.
لميديا ليكاتدرج فالتدوينة ديالك كاتساعد القارئ أنو يندامج ويرتاح فالقراءة و لكن بشرط أنك تستعملها بالطريقة الصحيحة وفالوقت المناسب طبعا.
كنصيحة ليك، قرا المدونات ديال المواقع لكبار وشوف الطريقة باش كايكتبوا وخود فكرة على كيفية إدراج الصور فالمقال ديالك بشكل جاذب للإنتباه، هادشي غايساعدك كذلك أنك تعرف الطريقة ليكايروجوا بيها للمنتوجات ديالهوم عن طريق التدوين.
وماتنساش تاخد لميديا ليكاتستعمل فالمقالات ديالك من مصادر خالية من حقوق الملكية وخليك مفكر دائما بلي ماشي فجميع المقالات ديالك ضروري أنك ضيف صور أو مقاطع ڤيديو….إلخ حيت بعض المرات كايكون عند هاد الأواخر تأثير سلبي وليهو تشتيت الإنتباه ديال القارئ.
الغرض ديال لميديا ماش الزواق ولكن الغرض منها أنك توصل للقارئ الفكرة ديالك بأبسط الطرق
اختار الأماكن ليممكن تدرج فيها الكلمات الدلالية بعناية
من بين الأخطاء ليكايرتاكب بزاف ديال المدونين هي أنهم ماكايكتبوش الكلمات الدلالية فالمقال ديالهوم بطريقة منظمة، بالعكس كايحطوها فالمقالات بطريقة عشوائية اعتباطية.
كتب كلمات دلالية عندها علاقة بالموضوع ليممكن القارئ يقلب عليه ولكن ماتبالغش
خلي شوية ديال المساحة ما بين كلمة دلالية وأخرى
واحد المسألة مهمة بزاف ولي قليل ديال المسوقين ليكايعرفوها: كتب كلمات دلالية كاتناسب مع الإحتياجات ديال العميل ماشي مع الإحتياجات ديال محركات البحث حيث لالغوريتم ديال جوجل ماكاتاخذش بعين الإعتبار عدد الكلمات الدلالية ليدرتي ( واخا دير مليون كلمة دلالية) قد ماكاتاخذ بعين الإعتبار راحة القارئ، يعني خلاصة الكلام خاص القارئ وهو كايقرا المقال ديالك يكون راضي ومرتاح حيت إلا تحقق هاد الشرط حتا محركات البحث غاتكون مرتاحة وغاطلع رانك ديالك عندها.
غاتقولي وكيفاش ممكن جوجل يعرف بلي القارئ مرتاح فقراءة المقال أو لا ؟ غانقولك بلي جوجل عندها بزاف ديال المعايير باش تعرف هادش ولي من بينها عدد الزوار ليزاروا المقالة ديالك وشحال ديال الوقت ستغرق كل واحد فيهم فالصفحة ديال المقال أو فالموقع ديالك بصفة عامة.
استهدف بالكتابة ديالك الشخص ليغايقراها، ماتستهدفش محركات البحث حيت جوجل تقدر تحلل المقالة ديالنا فثواني معدودة وتعرف الجودة ديالها ونسبة التوافق ديالها مع الموضوع ليكاتكتب فيه.
كتب المقالات بطريقة دورية
مهم بزاف أنك تعود الزوار ديال الموقع ديالك بواحد الوقت محدد ليكاتحط فيه المقالات.
هادشي كايخليهوم يتابعوك ويتسناو الوقت فوقاش يوصل باش يكتاشفوا الموضوع ليغاتكتب فيه خصوصا إلا كنتي مميز فطريقة الكتابة وكاطرح مواضيع ليكاتعود عليهوم بالمنفعة.
بغض النظر على واش غاتحط مقالات مرة فاليوم، أو مرة فالأسبوع أو حتا مرة كل شهر. خاصك تحدد واحد الوقت ليغاتحط فيه المقالات
صحيح بلي العدد مهم ولكن الحاجة ليمهمة أكثر هو الإلتزام
