كيفاش نكتب مقالة صديقة لمحركات البحث ديال Google؟

كلنا كانعرفوا الأهمية ديال الترتيب ديال المتجر أو الموقع الإلكتروني ديالنا فمحركات البحث ديال Google ولكن ماشي كلشي كايعرف الطريقة الصحيحة باش يوصل للمراتب الأولى ف Ranking عند Google
فهاد المقال غانتكلم على واحد الطريقة بسيطة ليتقدر تساعدك بشكل ملحوظ باش تزيد تبان أكثر فمحركات البحث باش يكون عندك ترافيك مهم على الموقع ديالك وبالتالي مبيعات أكثر
هاد الطريقة كاتعتامد على كيفية كتابة مدونة تكون صديقة لمحركات البحث والطريقة الصحيحة ديال الصياغة ديالها وبزاف ديال التفاصيل الصغيرة لي الأغلبية ماكايردوش ليها لبال

كيفاش غاتنفعك هاد الطريقة فزيادة المبيعات ؟!

تخصيص قسم خاص بالمدونات فالمتجر ديالك هو نقطة مهمة غاتساعدك فزيادة المبيعات
حيت كاتعتابر واجهة تواصل بينك وبين الزبناء ديالك وكاتساعدو باش يتعرف عليك أكثر ويلقا جواب للتساؤلات ليعندو، وكاتخليه يتصفح الموقع ديالك لوقت أطول.
كذلك التدوينات ليكاتحط فالموقع ديالك كاتساعدك باش تبان أكثر فمحركات البحث عبر الكلمات الدلالية ليكاتلعب عليها فالكتابة، الروابط، الصور…. وكل ماكان الشخص الزائر كايشعر بالإرتياح وكايدوز وقت طويل وهو كايتصفح الصفحات ديال الموقع ديالك كلما Google كايطلع Ranking ديالك عندو حيت من بين أهم المعايير ليكاتخدم بيها l’algorithme ديالو هي الراحة ديال الزائر

ندوزوا لأهم النقاط ليخاصك ترد ليها لبال ونتا كاتكتب المقالة أو المدونة فالموقع ديالك

كتب عنوان جذاب لييخلي القارئ متشوق باش يعرف المحتوى

العنوان كايتعتابر أول رسالة كاتوجهها للقارئ، إلا فشلتي فكتابة عنوان رائع لييجذب الإنتباه ديالو عرف بلي نسبة القراءة ديال المقالة ديالك غاتكون قليلة بزاف إلا ماقلناش منعدمة.
منين تجي تكتب العنوان فكر أول حاجة أنك تدرج فيه كلمات دلالية ومن الأفضل تكون باللغة الإنجليزية حيت دابا أغلب عمليات البحث كاتم باللغة الإنجليزية ومحركات البحث كاتعرف على الكلمات لي باللغة الإنجليزية أكثر من غيرها ولكن ماتبالغ فيها بزاف وماتخليش العنوان يكون طويل بزاف حيت غايجيب الملل للقارئ.

كتب مقدمة كاتعطي فيها فكرة على المحتوى ديال المقال

خاصك تعطي اهتمام كبير للمقدمة حيت كاتعتابر لباب ليكايدخل منو القارئ للموضوع ديالك، خاصك تخليه يرتابط بالمقالة ديالك من أول سطر وخاصو يعرف شنو غايقرا وعلاش خاصو يقرا التدوينة ديالك وشنو القيمة المضافة ليغاتزادليه إلا كمل لقراية حتا الآخر.
الدور ديال المقدمة ماكايقلش أهمية على الدور ديال العنوان، هما بجوج كايكملوا بعضياتهوم وفيهوم كايكون عنصر التشويق ليكايخلق متعة القراءة

قسم المقالة ديالك لفقرات صغيرة

خاصك تقسم المحتوى ديال المقالة ديالك لفقرات صغيرة وتكون فيها العصارة والخلاصة ديال الفكرة ليبغيتي توصل حيت فهاد الوقت وفزمن السرعة خاصك تعرف بلي إلا ماكانتش الطريقة باش كانكتبو مرتبة ومنظمة بالشكل الصحيح فأسهل حاجة هي يتخلا القارئ على المقالة ديالنا فالثواني لولا من بدء القراءة.
قسم الفقرات ديال التدوينة ديالك بطريقة معقولة ومنطقية وخلي مثلا فكل فقرة ما بين 5 حتا ل 7 ديال الأسطر باش تساعد الناس تقرا بلا مايجيها الملل

كتب الخاتمة ديال الموضوع بطريقة ذكية

من بين النقاط المهمة كذلك فكتابة المقالات هي الجزء الأخير منها ولي هو الخاتمة .
بزاف ديال القراء كاينقزوا من فقرة لفقرة بلا مايكملوها حيت كايبغيو ياخذو المعلومات بسرعة، داكشي علاش خاصك تعرف الطريقة الصحيحة ليغاتصيغ بيها الخاتمة ديال الموضوع ديالك باش توصل للهدف ليبغيتي من قراءة المقال ديالك ولي يقدر يكون هو أنك توجه الزبون لرابط خاص بمنتوج، أو أنو يتسجل فالقائمة البريدية ديالك….
أنك تخصص قسم خاص بالمقالات مهم بزاف وعندو بزاف ديال الإيجابيات ونقاط القوة ليغاتخليك تزيد بلبيزنيس ديالك لقدام من خلال زيادة الترتيب ديال الموقع ديالك فمحركات البحث وزيادة الترافيك ….. إلخ

فالجزء الثاني ديال المقال غانتعرفوا على بزاف ديال النقاط المهمة بحال:
الصور والروابط ليكاتحط فالمقالات ديالك ( نقاط مهمة خاصك ترد ليها لبال)
المعايير ليخاصك تبع باش تدرج الكلمات الدلالية فالمقالات ديالك
وبزاف ديال لحوايج ليغاتحسن الطريقة ديالك فكتابة المقالات