شنو خاصك باش تكون مسوق ناجح Successful Marketer
طبعا كلشي كيلاحظ ان بزاف ديال الشباب ولاو كيدخلو لهاد الضومين ديال التسويق،ولكن ماشي كلشي عندو مميزات المسوق الناجح كاين لي داخل غيرجبهة وصاف !!
دكشي علاش حنا جينا نساعدوك ونعطوك اهم المميزات للي خاصها تكون عندك باش تكون مسوق ناجح. هاد المميزات بحال للساس ديال الدار يلا مكانتش عندك صعيب تنجح فهاد المجال يلا ماقولتش مستحيل و من ابرز هاد المميزات:
1- الرغبة في التفوق:
وهادي اهم ميزة حيت هاد المجال فيه بزاف ديال الصعاب وعامر مشاكيل ويلا مكانتش عندك رغبة قوية فالتفوق مغاديش تقدر تكمل.
2 – الثقة في النفس:
هاد الميزة ضروري تنميها فيك حيت يلا مكنتيش انت تايق فراسك مغاديش يتيق فيك الزبون ديالك .
3 – تجنب الخوف من الفشل:
الفشل مصطلح مخاصوش يكون فالقاموس ديالك خاصك تدخل لمجال التسويق وانت غادي تنجح،اكيد غادي تطيح فمطبات ولكن اجعلها مصدر قوة وتعلم منها باش متكرر ش نفس الاخطاء .
4 – القدرة على مواجهة المشاكل وتحمل المسؤولية:
هاد الضومين عامر صداع الراس ومشاكيل ويلا مكانتش عندك القدرة على التحمل وتواجه اي مشكلة وقعات بكل مسؤولية وتاخد القرار المناسب ومتسرعش فسمحلي نقوليك صعيب تكمل.
5 – القدرة على التواصل مع الاخرين:
مجال التسويق هو مجال لكيعتمد بالاساس على الحوار مع الزبناء، يعني اللباقة في الكلام واداب الحوار من مسلمات التسويق ويلا مكنوش عندك خاصك تكتسبهوم
6 -مواكبة التطور:
فهاد السنين الاخيرة مجال التسويق كيتطور بواحد الوثيرة سريعة نهار على نهار كاين الجديد داكشي علاش خاصك تحرص على متابعة كل جديد من وسائل تقنية وتكنلوجية وفهاد النقطة كنصحك بالطرق التالية :
- قراءة الكتب المتعلقة بالتسويق : وفبلاصت ماتمشي تقلب على هاد لكتوبة شناهوما وشنو سميتهم TaadribGroup وفر عليك هاد تمارة وعطاك السمية ديال افضل 8 كتب في مجال التسويق الالكتروني يجب على كل رائد أعمال قراءتها
- قراءة الدراسات والابحات: وهادي اهم وسيلة لمواكبة التطور،غادي تقولي علاش غادي نقوليك حيت هاد الدراسات كتعطيك النتائج لي حققتها الشركات لكبار بعدما دارت بزاف ديال الدرسات باش توصل .لديك للنتائج
- المشاركة في المنتديات المتعلقة بالتسويق: هاد المنتديات مهمين حيتاش كيحضرو فيهوم كبار المسوقين لي عندهوم خبرة كبيرة وطويلة فالمجال وبالتالي اللقاء معاهوم غدي يفيدك وتقدر دير علاقات لي تزيد بيك لقدام
- الدورات التدريبية :فالحقيقة هادي وسيلة مزيانة باش تعلم ولكن خاصك تدير دورات لي تستافد منهوم ماشي دورات لي تخرج منها كيما دخلتي
