أول حاجة بغيت نوه ليها فهاد المقال هو أنك إلا كنتي كاتبيع المنتجات ديالك فالعالم العربي بمناسبة هاد الحدث مانصحكش تسميهاش الجمعة السوداء، من الأحسن سميها الجمعة البيضاء حيت الناس عندهوم حساسية من هاد التسمية وكاينفروا منها.

بزاف ديال الأنشطة التجارية أونلاين كاتحقق نسبة كبيرة من المبيعات ديالها خلال السنة في موسم الجمعة البيضاء ليكاتكون مرة وحدة فالسنة وبالضبط هي آخر جمعة فشهر نونبر وليغاتوافق يوم 29 نونبر لسنة 2019 إن شاء الله.
والسبب هو الكم لكبير ديال الدعاية والحملات الإعلانية المكثفة ليكاتخلي الناس عندها رغبة فالشراء واستغلال العروض والإنخفاض فالأثمنة ليكاتكون فهاد المناسبة
فهاد المقال غانتكلم على 7 ديال الأفكار ليتقدر تساعدك باش تكثف المبيعات ديالك فهاد الموسم وتخرج بأرباح كبيرة إن شاء الله.

الجمعة البيضاء هي آخر جمعة فشهر نونبر وهاد السنة غاتوافق 29 نونبر إن شاء الله، ومع الوقت ولات الجمعة البيضاء من نهار واحد فقط حتا ل 4 أيام وكاتستامر السبت والأحد وتسالي نهار الإثنين ليكايتسما ب Cyber Monday. وفاد المدة كايكونو بزاف ديال الأنواع ديال العروض، مثلا يوم الجمعة كاين الناس ليكادير 50% ديال التخفيض على جميع عمليات الشراك ليغادار فداك نهار، ويوم السبت مثلا منتوج هدية على كل منتوج شرا الزبون، ويوم الأحد 30% تخفيض … إلخ، وهادشي كايبقا غا مثال وماكاينش قاعدة ثابتة للعروض حيت كايبقا الإجتهاد الشخصي ديالك هو ليكايحدد العرض ليغادير.
الجمعة البيضاء بدات فأمريكا، ونتاقلات لبريطانيا وسنة 2014 تحديدا دخلات للعالم العربي وبدات كاتعرف فيه، ومع الوقت ولات الثقافة ديال التسوق والشراء عبر الأنترنيت كاتنتاشر بين الناس وولات الجمعة البيضاء موسم كبير وفرصة ماكايفوتوهاش الناس أي كانت الفئة العمرية ديالهوم.

أول فكرة هي ل Flash Sale

ل Flash Sale هي واحد العرض ليكايكون صالح فواحد الساعة محددة فاليوم يعني كاتمتد المدة ديالو لساعة زمن فقط.
كاتعتابر هاد الطريقة من بين أقوى الوسائل التسويقية ليكايكون عندها تأثير إجابي كبير من حيث المبيعات سواء فموسم الجمعة البيضاء أو غيرو، الفكرة ديالو هي أنك كاتحط واحد العرض صالح غير خلال ديك الساعة ولي مثلا كايكون فيه تخفيض كايوصل حتا ل 80 أو 90 % من ثمن المنتوج، أو منتوج هدية من بعد القيام بعملية الشراء … إلخ
ومن بين التفاصيل ليكاتزيد تربط الناس باش يدخلوا ويشريو بسرعة هي وضع تطبيق للعد التنازلي الخاص بداك العرض. وأهم حاجة خاصك تردليها لبال باش تستافد من ل Flash Sale هي أنك تجنب أوقات العمل أو أوقات النوم باش الزبون يكون متوفر ومستاعد

الفكرة الثانية هي أنك تعطي هدايا مع عمليات الشراء

فهاد الموسم ديال الجمعة البيضاء الناس كاتسنا منك تكون سخي معايا فالعروض ليغاتقدم ليها، وماكاين ماحسن من أنك تحفز الزبناء ديالك بهادايا أو قسائم شراء أومنتوجات مجانية إلى جانب الطلبيات ديالهوم عند كل عملية شراء كاتجاوز واحد المبلغ معين، بهاد الطريقة كاتشجعهوم يشريو واحد القدر مهم من المنتوجات وفنفس الوقت كايكون عاجبهوم لحال وكايتفكرو فلجيست ليدرتي معاهوم.
إلا ماكنتيش قادر أنك تعطي للزبناء ديالك هدايا أو قسائم شراء على المشتريات ديالهوم على الأقل دير واحد السحب للناس ليشراو من عندك وفلخر واحد فيهوم غايربح بهدية مغرية

صايب واحد Catalogue ديال العروض ليغادير

بزاف ديال الناس كاتسنا هاد المناسبة السنوية باش تاخد هدية لصديق أو شي واحد عزيز عليها، وبزاف منهوم كايترددوا ويتراجعوا فقرار الشراء بسباب أنهوم ماكاتكونش عندهوم فكرة واضحة على داكشي ليبغاو ياخدوا، وهنا كايجي الدور ديالك أنك تساعدهوم وتوجه الإختيار ديالهوم.
صايب واحد Catalogue ليفيه بزاف ديال الإختيارات المتنوعة والمغرية وعطيه عنوان جذاب ومثير للفضول:

مثلا أفضل خمس منتجات مبيعا لهاد السنة.
أفضل الهدايا ليممكن تعطيها للأمهات أو الأزواج أو الزوجات ….
أحسن 10 ديال العروض ليماخاصكش تفوتها …. إلخ

وحاول ذكر السبب ليخلا هاد العروض تكون هي الأفضل من بين العروض لاخرين ليكاينين عندك

يتبع للجزء الثاني إن شاء الله … ماتفوتوهش