بديت فالتجارة الالكترونية ومقديتش نكمل!!!

بزاف ديال الشباب كيدخلو لضومين ديال التجارة الالكترونية ومكيكملوش، علاش ؟قبل مانقليك الاسباب خليني نخبرك بواحد الاحصائية تدارت ف 2018 هاد الاحصائية كتقول ان عدد الاشخاص ليكيدخلو لمجال ديال التسويق الالكتروني فكل سنة تقريبا 15000 الف شخص ولكن %1فقط من هاد الرقم هو لي قادر يدخل فعليا فالضومين اي تقريبا 150 شخص ، وحتى هاد 150 شخص %5 فقط منهوم ليكيدخلو ديال بصح .

من خلال هاد الاحصائية غادي يباليك بزاف ديال الناس كيعانيو وكيتخلاو على الضومين شنو هما الاسباب؟ ،غادي نحاولو نجمعهوم ف 5 ديال النفط

1- اخد فكرة خاطئة على التجارة الالكترونية.

الخطأ لكبير ليكيوقعو فيه الشباب انهم كيضنوا ان هاد المجال بسيط وساهل مكيحتاج حتى لشي مجهود ويمكن لأي شخص ينجح فيه وكيحسابلو مع الدخلة غدي يبدا يضرب فالدولار وفاش كيبدا كيتصدم بالواقع وكيعرف ان الضومين هو علم كبير و فيه بزاف ديال التخصصات وكيحتاج لواحد لمجهود كبير باش تكون مميز وهادشي كيسببلو صدمة واحباط في نفس الوقت وبالتالي كيستسلم.

2-الدورات المخيبة للامال.

من اهم الاسباب لي كتحبط الشباب هو داك الدورات الفارغة من المحتوى بحيت من هب ودب كيعطي الدورات وكيوهموا المبتدئين على انهم بمجرد ميخدو داك الدورة غادي يديرو لباس ، والصدمة كتكون فاش كيخاد داك الدورة وكيلقى راسو مستافد حتى حاجة ومزال فبلاصتو .حنا مكنعمموش بصح كاينين دورات رائعة ليكتستفد منهوم وكتعمر راسك بالمعلومات.

3- قلة المصادر العربية.

المحتو العربي فهاد المجال مزال بعيد بزاف بحيت اي واحد بغا يتعلم التسويق الالكتروني كيلقى المحتوى العربي ضعيف ومكيواكبش التطور السريع لي كاين على الساحة وبالتالي كيكون قدامو فقط المحتو الاصلي لهاد المجال وهو المحتو الانجليزي وهنا المشكلة كتكون فاللغة .

4- تعدد مجالات التجا رة الالكترونية .

مجال التجارة الالكترونية هو مجال كبير والتخصصات ديالو كتيرة ومتشعبة والمشكلة هنا الشباب مكيحاولش يشد واحد الضومين ويمشي فيه ،لا؛ كيبدا يقرا شوية هنا وياخد شوية ديال المعلومات ويسمح فيه ويمشي لضومين اخر ويسمح فيه وهكدا حتى كيلقى راسو مشتت كل ضومين عند عليه فكرة مكتاهلوش باش يمشي فيه مزيان ولا يدخل حتى ريال بداكشي لي خدا.

5- تعدد المصادر التعليمية.

من اكبر النعم علينا هي المصادر التعليمية فمجال التجارة الا لكترونية متوفرة بزاف وبكافة اشكالها المرئية، المسموعة،المقروئة واي واحد بغا يتعلم كيمشي لهاد المصادر (جوجل،الفيسبوك، انستغرام….)الا انو مع ذالك هادالمصادر رها سيف ذو حدين فكيما كتساعد ناس على انهم يزيدو لقدام كاينين ناس ا خرين كتسببلهوم تشتت.

وفالاخير راه الهدف ديالنا من طرح هاد الموضوع ماشي هو نزيدو نحبطوك ولكن باش تاخد الحيطة والحذر من هاد الاسباب وتحاول تركز مزيان على لهدف ديالك وتخدم عليه وتحدد اشمن مجال بغيتي وتقرا عليه مزيان ،باش تكون مؤهل انك تدخل مع القافلة ديال المسوقين الالكترونين.