5 قواعد خاصك تعرفها قبل ماتبدا تسويق على سوشيال ميديا
إلا كنتي غاتبدا بيزنس جديد أولا عندك بيزنس قديم ونتا محتاج باش تسوق ليه من خلال منصات التواصل الإجتماعي خاصك تعرف بعض القواعد قبل ماتبغي تصايب الحملة الإعلانية ديالك على Social Media
فهاد المقال غانعرفوا 10 ديال القواعد مهمة بزاف ليغاتضمن النجاح ديال الحملات الإعلانية ديالك للجمهور لينتا كاتستهدفو
أول قاعدة سمع للزبناء ديالك قبل ماتوجه لهم الإعلان ديالك
شنو المقصود من أنك تسمع للزبناء ديالك يعني درس الإحتياجات ديالهوم وعرفهوم شنو باغيين بالضبط باش تقدر تقتارح عليهوم العرض ليهوما كايتسناوه منك وليماغايلقاوهش عند المنافسين ديالك وتبين ليهوم بلي المنتوج ديالك هو الحل الأمثل لواحد المشكل (X), دخل قرا التعليقات ديالهوم، شوف لحوايج ليكايتفاعلوا معاها كثر، حاول دخل معاهوم ف حوارات ونقاشات، ديك ساعة غاتفهم مزيان الطريقة ديال التفكير ديالهوم والحاجة ليكاتحرك المشاعر ديالهوم وهادشي مهم بزاف باش تعرف تكتب رسالة إعلانية مأثرة وليغاتخليك باش توصل للأغلبية الساحقة ديال الناس ليكاتستهدف
القاعدة الثانية هي أنك تركز على الجودة ديال الناس لي كتستهدف ماشي على العدد ديالهو
حيت من بين أكبر الأخطاء ليكايرتاكبها الأغلبية ديال المسوقين ليماشي محترفين فهاد المجال هي التركيز على أكبر عدد من الزبناء من غير مايردوا لبال للجودة ديال هاد الزبناء، وهادشي مع الوقت كايتسبب فالتوقف ديال البيزنيس ديالهوم، إلا كان عندك 1000 متابع للنشاط التجاري ديالك و كايتفاعلوا مع العروض ديالك ومهتمين بالمنتوج وديما كايتسناو الجديد ديالك حسن من يكون عندك 10000 متابع مامهتمينش وماكايتفاعلوش مع المجهود ديالك، Work Smart, Not Hard
القاعدة الثالثة: خاصك تصبر على النتائج
كانعرفوا كاملين بلي التسويق الإلكتروني ماكاتبانش النتائج ديالو بين يوم وليلة، خاص يكون عندك الصبر ويكون النفس ديال طويل بزاف وتخدم ليل ونهار باش تبني واحد الأساس قوي للبيزنيس ديالك، من بين لحوايج ليلازم نركزوا عليهوم باش نقدروا نبنيو واحد القاعدة صلبة لأي بيزنس هما ثلاثة ديال لحوايج معروفين:
خاصك توجد واحد المنتوج قوي ليغايقدر يساعدك باش دير بلاصتك فالسوق من ناحية الجودة والثمن
خاصك تقلب على أشخاص ليلجودة ديالهوم كبيرة بزاف وليمحتاجين ومهتمين بالتخصص ليكاتخدم فيه
ثالث حاجة خاصك تعرف كيفاش توجه هاد المنتوج وتسوقليه بطريقة احترافية ومختالفة على المنافسين ديالك
باش يبقا العدد ديال الزبناء فتزايد مستمر والأرباح حتا هيا تبقا غادا وكاتزيد
القاعدة الرابعة: جودة ديال المنتوجات والإحترافية فالتعامل مع الزبون ديالك
بني البيزنيس ديالك على الجودة ديال المنتوجات والإحترافية فالتعامل مع الزبون ديالك حيت هاد النقطة إلا ماعطيتيهاش حقها من الإهتمام غاتقدر ضيع منك بزاف ديال الزبائن وبالتالي غاياخدهوم منك المنافس ديالك، زيد على هادشي خاصك تبني واحد العلاقة ديال الثقة بينك وبين الزبون وتعطيه معلومات حقيقية على النشاط التجاري ديالك والمنتوج ليغاتبيعليه حيت هادشي غايشجعو باش يشارك المحتوى ديالك مع الناس ليكايعرف وغايتطور لبيزنيس ديالك وغايزيد لقدام
القاعدة الخامسة: تابع النشاطات ديال المنافسين ديالك
خليك ديما متابع النشاطات ديال المنافسين ديالك ومتابع الناس ليقبل منك فالمجال، هادشي غايخليك دائما عارف الجديد وتستافد من الأفكار والخبرات ديال لاخرين، وغاتبقا ديما A Jour فالمجال ديالك وتبقى حاضر بقوة بالرغم من المنافسة ليموجودة فالسوق وتوصل للقمة, بهاد الطريقة كاضمن الإستمرارية ديال البيزنيس ديالك وكاتجنبوا يرجع لور أو يموت فمرة. وخاصك تعرف بلي العملاء ديالك خاص دائما يشوفوا المنشورات ديالك ويبانليهوم الإعلانات ديالك حيت إلا غبرتي عليهوم يمكن ينساو ل Brand أو العلامة التجارية ديالك.
