كيفاش تستعمل الفيديو Video باش تسوق للبيزنيس ديالك

فهاد المقال غانهضر على كيفاش تقدر تستعمل الڤيديو باش تسوق وتشهر لبيزنيس أو لبراند ديالك.
السؤال ليكايتطرح على بزاف ديال المسوقين هو: إينا نوع ديال لڤيديووات خاصني نتج باش نشهر لبيزنيس ديالي بشكل سليم؟ شنو النوع ديال لڤيديوات لينقدر نضيع فيها الوقت والجهد ديالي؟
فهاد المقال ماغانتكلمش على كيفاش نصايب ڤيديو، هاد المسألة ساهلة تقدر تشوف أي Tuutorials أو دورة تعليمية باش تكتاسب هاد المهارة، غانتكلم على المحتوى ليخاصك تنتج فالڤيديو ليغاتروج بيه للعلامة التجارية ديالك والإستراتيجية ليغاتبع .

1) ڤيديو عبارة عن مقدمة Introduction للبيزنيس ديالك

باش تروج للبيزنيس ديالك بشكل منظم وتدريجي من الأحسن ماتبداش ب ڤيديو لي الهدف منو البيع من أول مرة.
أول تواصل مع الزبون ديالك ماخاصكش تبين ليه بلي راك باغي غا تبيعليه المنتوج ديالك.
الهدف الأساسي من هاد الڤيديو ماشي هو تعرض للزبون شنو هما المنتوجات أو الخدمات ديالك، هادشي ماكايجيش فلول، هادشي كايجي بالتدريج.
الهدف الأساسي من هاد النوع ديال المحتوى هو أنك تواصل مع الزبون ديالك وتعطيه فكرة على شكون نتا وشنو هي التجربة لييقدر ياخدها إلا تعامل معاك؟ شنو الإحساس ليغايكون عندو إلا تعامل معاك؟ كيفاش غاتعامل معاه؟ شنو ليعندك مختالف على بقية المنافسين؟
هاد النوع ديال الڤيديووات كايمثل فقط مقدمة على لبيزنيس ديالك وكايربط التواصل بينك وبين الزبون وكاتأهلوا باش يشوف الجزء القادم من الخطة التسويقية ديالك.

2) النوع الثاني ديال الڤيديو هو شرح العروض ديالك

هاد النوع ديال المحتوى هو النوع الأكثر تواجدا عند المسوقين، والخطأ الشائع ليكالقاو هو أن أغلب الشركات كاتخدم بهاد النوع ديال المحتوى باش تربط أول تواصل مع الزبون وهذا خطأ كبير ممكن يكون عندو تأثير سلبي على النتائج ديال الحملة الإعلانية ديالهوم.
هاد النوع ديال المحتوى خاص يجي فالمرتبة الثانية من الخطة التسويقية ديالك، وفيه كاتشرح للزبون المحتمل ديالك على المنتجات والعروض ديالك ومن طبيعة لحال ماتنساش تربطهوم بالإحتياجات ديالو وتبينليه شنو القيمة المضافة ليغاتزيدليه فحياتو إلا اختار باش يتعامل معاك

3) محتوى كاتبين فيه شهادة الزبناء Costumers reviews and stories

هاد النوع ديال المحتوى كايجسد كيفاش كانت التجربة ديال الزبناء ليفعلا تعاملوا معاك وكايعبر على الشهادة ديالهوم (من طبيعة لحال خاص تكون تجربة حقيقية).
هاد النوع ديال المحتوى مهم لواحد الدرجة ماكاتصورش حيت كايلعب دور كبير فكسب الثقة ديال الزبناء المحتملين ديالك وكايزيد يشجعهوم باش يعيشوا حتا هما نفس التجربة ديال الناس ليقبل منهوم أو علاش لا لتجربة أحسن.
الجزء الأساسي ليخاصك تركز عليه هو أنك تحكي للناس ليكاتستهدف على التجربة ليعاشها الزبناء ليقبل منهوم وتحاول تقيس المشاعر ديالهوم، وتبين للزبناء المحتملين بلي حتا هما يقدروا تعيشوا تجربة رائعة إلا ختارو باش يتعاملوا معاك حيت الزبون بالطبع ديالو ماكايبغيش يكون أول واحد، بالعكس كايبغي يشوف ويسمع الشهادة ديال الزبناء الآخرين عاد يمكن ياخد القرار ديالو.

4) ڤيديو للهدف منها هو أنك توصل واحد المعلومة

خاصك تبين للزبناء ديالك بلي نتا كاتبغي العمل ديالك وبلي كاتبغي ليهوم ديما لخير وكاتفكر فيهوم، وبلي الإعلانات ديالك ماشي الهدف ديالها ديما غا لبيع وهاد النوع ديال الڤيديووات كايساعدك باش توصل ليهوم هاد الرسالة .
هاد النوع ديال المحتوى كيفما ذكرت كاتحاول توصل فيه واحد المعلومة مفيدة للزبناء ديالك، ولكن خليني نشرحليك كيفاش حتا نتا كاتستافد.
أول حاجة كاتكسب الثقة ديال العملاء ديالك وكاتقوي العلاقة معاهوم وكاتخليهوم ديما مفكرينك.
ثاني حاجة خاصك تكون ذكي فالمعلومة ليكاتوصليهوم بحيث تقدر تكون هاد المعلومة كاتبين ليهوم فيها طريقة الإستعمال ديال منتوج من منتجاتك ….. إلخ.
أهم حاجة المعلومة ليكاتشارك معاهوم تكون عندها علاقة بلبيزنيس ديالك باش تخليهوم ديما قرابين منك